Ante o abraiante éxito obtido no anterior número da revista, e atendendo as reiteradas peticións dos lectores para que este espazo volvese aparecer, convidamos outras tres personalidades do noso ámbito profesional a contestar ao cuestionario, que vai camiño de converterse nun clásico do xornalismo.

O próximo/a podes ser ti...

Nesta ocasión responderon ás nosas preguntas ANTONIO ROMA VALDÉS (fiscal), RITA GOIMIL MARTÍNEZ (procuradora) e JAVIER SÁNCHEZ-AGUSTINO (avogado).

1. Unha de libros

• Cal foi o último libro (non xurídico) que liches?
  ANTONIO: Gabriel Tortella, Los orígenes del siglo XXI.
  JAVIER: Ando interesado en descubrir quen di a verdade na sarta de bobadas que a favor e en contra da teoría do cambio climático se din ultimamente. Lin A vinganza da Terra do científico inglés James Lovelock.
  RITA: As metamorfoses de Ovidio, sempre vén ben repasar a mitoloxía da man deste gran poeta latino.

• Que libro lle regalarías ao teu mellor amigo?
  ANTONIO: Erasmo, Eloxio da loucura.
  JAVIER: Vou pecar de inmodesto, regalaríalle o libro do que son autor, titulado En 30.555 palabras.
  RITA: O cazador de barcos, de Justin Scout, no que este escritor estadounidense, gran coñecedor do mundo do mar e dos barcos, nos relata unha vibrante historia de suspense que fixeron que esta novela sexa a segunda máis lida no tema náutico despois de Moby Dick.

• E ao teu peor inimigo?
  ANTONIO: O código da Vinci.
  JAVIER: Como seguro que le con dificultade, ocórreseme que un infantil de Gloria Fuertes.
  RITA: Seguindo a frase "ao inimigo nin auga", tampouco lle regalaría un libro.

• Se só puideses salvar un libro da fogueira, cal salvarías?
  ANTONIO: Aínda que soe a tópico, O Quixote.
  JAVIER: Rescataría o poema épico por excelencia, A Odisea de Homero.
  RITA: O Quixote.

2. Outra de cine

• En que película non puideches evitar quedar durmido/a?
  ANTONIO: Non me gustan as subvencionadas.
  JAVIER: Botei un soniño na Caixa Kovac, pero tamén -e hoxe sorpréndome- na primeira de Harry Potter.
  RITA: Calquera telefilme do domingo pola tarde.

• Cal é a película que non te cansas de ver?
  ANTONIO: Calquera do tipo A guerra das galaxias ou Kill Bill.
  JAVIER: Ben-Hur. Téñoa gastada, repítoa completa, por escenas, por diálogos... E non me resisto a comentar o momento no que o cónsul Quinto Arrio moi impaciente intercede en defensa da demostrada inocencia de Judah Ben-Hur ante o César, e este facendo exhibición do poder do imperio interpélalle: "...Quinto Arrio, Quinto Arrio, consentídenos ser xenerosos "...
  RITA: Master and Commander, baseada nun libro de Patrick O’Brian, dirixida por Peter Weir e protagonizada por Russell Crowe, que nos conta a historia do capitán de navío británico, Jack Aubrey, ao mando da Surprise. En 1805, cando os imperios se gañaban no mar, recibe as ordes de capturar o buque insignia da armada francesa, Aucheron, e perségueo polos mares do sur e loita tamén contra as tempestades e motíns.

3. Historia

• Con que personaxe da Historia irías cear?
  ANTONIO: Iría comer con Felipe II ou Alfonso X. A cear coa miña señora.
  JAVIER: Se mo permitisen, iría con dous: con Xulio César e Cleopatra.
  RITA: Con Leonardo da Vinci.

4. Arte

• Que obra de arte, monumento ou lugar emblemático te deixa abraiado/a?
  ANTONIO: A boa pintura de calquera época. Xa que teño que elixir, ¿vale Picasso?
  JAVIER: A pregunta é para nota... Quedo cos xardíns de Versalles, pero non podo deixar de dicir que moitas mañás me asombro coa praza do Obradoiro.
  RITA: As cores do outono na Serra do Caurel.

5. Música

• Cal é a música que consegue amansarte neses “momentos fera”?
  ANTONIO: Momentos fera, eu? Imposible. Ben, pois: clásica, mellor en vivo, especialmente a ópera, mellor as versións antigas. Tamén a música dos 80 (pop, rock, de todas as clases, que máis dá, era xenial).
  JAVIER: Recorro á "Entrada da Raíña de Saba" do Oratorio Salomón de Handel no arranxo de Sir Thomas Beecham, tanto se a fera xa emerxeu coma se necesito retroalimentación.
  RITA. Calquera dos Smiths ou o "Boss".

6. Por último, viaxes

• Cal é a viaxe que fixeches que máis che gustou e a que aínda non puideches facer, pero que seguro que non perderás?
  ANTONIO: A que fixen a Marrocos, e a que non hei perder Nova York.
  JAVIER: A que máis me gusta sempre é a última, este verán alcancei o cume do pico máis alto do Sistema Central na Serra de Gredos, "O Almanzor" de 2.596 metros. Espero que algún día o orzamento me permita deixarme caer pola Polinesia: Illas Fidji e Tahití, por exemplo, non estarían nada mal.
  RITA: A que máis me gustou foi cruzar Marrocos en todoterreo e a que non perderei será destino Nova Zelanda.