Que é un certificado dixital?

Do mesmo xeito que un certificado en papel, o certificado dixital consiste nun conxunto de datos que leva a sinatura dunha Autoridade de Certificación.

Un certificado dixital está formado por:

• Clave privada, só accesible polo titular do certificado dixital. A clave privada serve basicamente para crear a sinatura dixital e para desencriptar mensaxes recibidas.
• Clave pública, accesible por cualquera persoa. A clave pública serve para verificar sinaturas dixitais e para encriptar mensaxes.
• Certificado que contén a clave pública e os datos para verificar a identidade do emisor.

Que é unha Autoridade de Certificación?

A Autoridade de Certificación é unha terceira parte de confianza que asocia o par de claves a un titular.

Responsabílizase de:

• O contido dos certificados.
• A emisión e validez destes.
• Revogalos se quedase comprometida a súa seguridade.

A validez dun certificado depende de:

• A credibilidade de quen o emite, é dicir, da Autoridade de Certificación.
• O método e os recursos utilizados para a súa emisión, soporte, identificación, seguridade, etc...
• O ámbito profesional do recoñecemento deste certificado.

Que é unha Autoridade de Rexistro?

• A Autoridade de Rexistro é un punto de rexistro dos colexiados ante a Autoridade de Certificación
• Constitúense en Autoridade de Rexistro os colexios profesionais.
• É a encargada de emitir un certificado dixital, en presenza do colexiado.
• A súa función é exclusiva e non pode ser delegada a unha terceira parte independente.

O Ilustre Colexio de Avogados de Santiago de Compostela está constituído como Autoridade de Rexistro.

As funcións deste Colexio como Autoridade de Rexistro serán as seguintes:

• Xestionar as peticións do carné dixital.
• Rexistrar os usuarios.
• Aprobar peticións de certificación.
• Revogar certificados de entidade final.

Que tipos de certificados emite unha Autoridade de Certificación?

Certificados internos: emitidos polos administradores

• Certificado de administrador: Valida e revoga os certificados dos operadores das Autoridades de Rexistro (colexios de avogados).
• Certificado de operador: Valida e revoga certificados de colexiados e empregados do seu colexio.

Certificado de usuario final: emitido polos operadores dos colexios.

• Certificado de colexiado: Identifica unha persoa física e acredítao como colexiado dese colexio.
• Certificado de empregado: Identifica unha persoa física que manteña unha relación xurídica co colexio.

Que é ACA?

ACA é a Autoridade de Certificación da Avogacía e é a resposta á necesidade dos avogados españois de dispoñeren dunha entidade confiable que os acredite como letrados para realizar transaccións electrónicas.

ACA ofrece os seguintes servizos:

• Acredita fronte a terceiros e de forma remota a identidade e a condición de avogado.
• Evita a suplantación da identidade e o intrusismo profesional.
• Asinar correos electrónicos e documentos electronicamente asegurando a procedencia e autoría.
• Ter eficacia probatoria.
• Acceso a servizos telemáticos das administracións públicas.
• Acceso aos servizos de RedAbogacia.org orientados a permitir o exercicio profesional a través de Internet.

Vantaxes que ofrece ACA aos colexios:

• Permite certificar a condición de avogado en Internet.
• Asegura a identidade dos colexiados que realizan trámites co colexio a través de Internet.
• Asegura o contido das comunicacións realizadas entre o colexio, os colexiados e terceiros como administracións públicas.
• Permite mellorar o servizo que o colexio ofrece ao colexiado.

Vantaxes que ofrece ACA aos colexiados:

• Proporciona os instrumentos necesarios para que, a través da rede, poidan exercer profesionalmente grazas a acreditaren electronicamente a súa condición de avogado.
• Permitirá o acceso a calquera servizo dentro da infraestrutura de seguridade da Avogacía:
  • Presentación telemática de escritos aos xulgados
  • Comunicacións de intervención profesional
  • Rexistro de penados e rebeldes
  • Axenda xudicial
  • Asuntos de xustiza gratuíta e liquidación destes
  • Participación en poxas xudiciais
  • Permite realizar cobros e pagamentos no exercicio
  • Pases a prisións...

Que é Rede Avogacía?

É unha rede de comunicacións que permite a interoperabilidade entre os distintos colexios de avogados e os seus colexiados. Estas comunicacións e outros servizos levaranse a cabo dentro do espazo www.redabogacia.org .

Estes servizos telemáticos encóntranse agrupados nas zonas seguras que cada colexio ten en www.redabogacia.org xunto cos accesos a outros servizos telemáticos realizados por outras institucións coas que a Avogacía chegou a un acordo de recoñecemento.

Servizos dispoñibles:

• Listaxe de noticias
• Consulta do censo de letrados
• Solicitar pases de prisión
• Intervención profesional
• Oficina Postal
• Buromail
• Páxina do catastro

Como solicitar o carné dixital?

Para solicitar o novo carné dixital deberase remitir unha fotografía tamaño carné e unha fotocopia do DNI ás oficinas do Colexio de Avogados de Santiago de Compostela.

Unha vez que estea personalizada a tarxeta daráselle unha cita ao colexiado para que se presente nas oficinas do Colexio e os operadores carguen o chip desta. Para isto o colexiado deberá dar unha conta de correo fiable, o máis recomendable é que sexa unha conta propia do Colexio, e introducir o pin e o puk na súa tarxeta.

Logo de que estea cargada a tarxeta deberán asinar o contrato de prestación de servizos de certificación.

Cando a tarxeta estea correctamente cargada e o contrato asinado faráselle entrega ao colexiado do seu novo carné dixital e o kit de instalación, totalmente gratuíto.